Eth Govèrn formalize eth transferiment dera gestion des espacis naturaus protegidi ath Conselh Generau d’Aran
- A aprovat eth decrèt qu’oficialize eth transferiment de competéncies decidit en Plen dera Comission Bilaterau Govèrn dera Generalitat – Conselh Generau d’Aran eth de junh de 2017
- En vertut der acòrd, era Generalitat transferís annaument ath Conselh Generau d’Aran 102.500 èuros annaus entà accions de conservacion enes espacis naturaus protegidi (Hilat Natura 2000 e PEIN), e tà ampliar es mejans personaus per amiar-les a tèrme
Eth Govèrn a adoptat eth decrèt qu’oficialize eth transferiment de foncions e servicis dera Generalitat de Catalonha ath Conselh Generau d’Aran en matèria de gestion d’espacis naturaus protegidi en territòri d’Aran. Eth decrèt da compliment ara Lei 1/2015, deth 5 de hereuèr, deth regim especiau d’Aran, qu’establís que correspon ath Conselh Generau d’Aran era gestion de toti es espacis limitadi ar encastre territoriau d’Aran, era potestat tà declarar es figures de proteccion e delimitacion d’espacis, era gestion e era vigilància deth Hilat Natura 2000 e de toti es espacis protegidi declaradi en sòn territòri, e era participacion tà aprovar es mapes deth paisatge e elaborar un catalòg deth paisatge en sòn encastre territoriau.
Precisament, eth Plen dera Comission Bilaterau Govèrn dera Generalitat – Conselh Generau d’Aran, ena sesilha de 13 de junh de 2017, adoptèc er acòrd relatiu ath transferiment de foncions dera Generalitat de Catalonha ath Conselh Generau d’Aran en matèria de gestion d’espacis naturaus protegidi en territòri d’Aran.
Eth decrèt adoptat aué oficialize aguest acòrd, que concretaue un transferiment annau dera Generalitat ath Conselh Generau d'Aran entà accions de conservacion enes espacis naturaus protegidi (Hilat Natura 2000 e PEIN). Concrètament pes accions següentes:
- Accions de proteccion, restauracion e melhora deth patrimòni naturau.
- Accions d’ordenacion des usatges publics e difusion des valors ambientaus.
- Accions de manteniment e gestion d’abitats.
- Aquisicion de materiau de besonh entara realizacion des accions de gestion previstes.