Eth Govèrn dar pos ar usatge der aranés enes wèbs dera Generalitat de Catalonha e eth sòn encastre institucionau
- Incorporarà progressivament er aranés enes wèbs deth president e deth Govèrn en toti aqueri contenguts estables de sòrta institucionau e istorica, coma opcion lingüistica clarament visibla e accessibla
- Establirà un programa de trabalh especific tà auançar ena incorporacion dera version en aranés, enes tramits e servicis aufridi pes diferenti departaments dera Generalitat de Catalonha en wèb corporatiu
Eth Govèrn a decidit dar pos ara preséncia der occitan, aranés en Aran, en encastre institucionau numeric dera Generalitat de Catalonha. En aguest sens, incorporarà progressivament er aranés enes wèbs deth president e deth Govèrn en toti aqueri contenguts estables de caire institucionau e istoric, coma opcion lingüistica clarament visibla e accessibla.
Eth Govèrn establirà un programa de trabalh especific tà auançar ena incorporacion dera version en aranés, enes tramits e servicis aufridi pes diferenti departaments dera Generalitat de Catalonha en wèb corporatiu. D'un aute costat, s’incorporaràn en aranés aqueri contenguts des wèbs corporatius dera Generalitat de Catalonha e deth sòn sector public que siguen especificament relacionadi damb Aran. Tanben se harà version aranesa des notícies e informacions que concernisquen especiaument Aran. Eth Govèrn tanben preve publicar es contenguts des canaus oficiaus d’informacion e comunicacion enes diferenti hilats sociaus en aranés, quan aguesti concernisquen o siguen dirèctament relacionadi damb Aran; e incorporarà era version en aranés des principaus campanhes institucionaus de sòrta generau, especiaument en aqueri formats adreçadi a mejans numerics.
Pr'amor d'amiar a tèrme aguestes accions, eth Departament de Cultura, a trauès dera Direccion Generau de Politica Lingüistica, establirà un plan de trabalh a sies mesi, amassa damb es diferenti departaments, entara sua metuda en òbra. Eth Departament de Cultura tanben harà un seguiment interdepartamentau deth plan, prepausarà iniciatives conjuntes damb era rèsta de departaments e organismes tà aumentar era preséncia der aranés en encastre institucionau numeric, determinarà auti encastres oficiaus entar impuls der aranés e facilitarà e orientarà en prètzhèt d’incorporacion der aranés.
Aguestes accions s’ampliaràn a auti contenguts a mesura qu’es recorsi lingüistics ac permeten.