Eth Govèrn hè balanç des politiques d’ocupacion en Aran
- S’aufrís sosten e finançament a trauès deth Hilat d’Atenèus Cooperatius e es diuèrsi programes deth SOC, entre auti
Eth Conselh Executiu, en tot profitar era sua reünion en Aran, a hèt balanç des politiques d’ocupacion en aguest territòri. En encastre dera economia sociau e cooperativa, eth Govèrn dera Generalitat, a trauès deth Departament de Trabalh, Ahèrs Sociaus e Familhes, destine un montant de 222.000 èuros ar Atenèu Cooperatiu deth Naut Pirenèu e Aran.
Aguest ei un espaci de trobada e coordinacion que nèish tà dar pos ara economia sociau e cooperativa en territòri, crear lòcs de trabalh de qualitat promoigudi per e tàs estatjants des parçans de montanha, e estimular d’aguesta manèra era economia locau. Ei constituït peth Conselh Generau d’Aran, eth Conselh Comarcau deth Palhars Sobeiran, eth Conselh Comarcau dera Nauta Ribagòrça, eth Conselh Comarcau deth Naut Urgèlh, e eth Conselh Comarcau dera Cerdanha. Tanben i collabòren IDAPA, Pediatria dels Pirineus SCCLP, Cooperativa Social Trends SCCL, Cooperativa Corroncui SCCL, Cooperativa Agrària i Ramadera del Pallars SCCL, Associació Alba, Pirineus gestió SL, Cooperativa Piro_Negawatt SCCL.
A compdar dera sua metuda en òbra, ara hè un an, s’an amiat a tèrme 52 activitats de foment dera economia sociau e cooperativa, s’a dat formacion en 13 centres educatius damb mès de 600 participants, entre professorat e esscolans e s’a hèt assisténcia a 13 projèctes empresariaus. Autaplan, s’a artenhut era insercion professionau d’un totau de 19 persones, era creacion de dues entrepreses dera economia sociau e mès d’un milèr de persones an participat enes diuèrses activitats.
D'un aute costat, a trauès deth quadre deth programa Singulars tanben s’a autrejat ua subvencion de 60.000 èuros a un projècte promoigut per Som Biomassa SCCL, que preve era creacion d’ua cooperativa e de 4 lòcs de trabalh.
Per çò qu’ei des politiques que desvolòpe eth Servici d’Ocupacion de Catalonha (SOC), er investiment se destine a diuèrsi servicis e linhes d’accion:
· Orientacion professionau en territòri e foment dera ocupacion des persones joenes d’Aran damb un budget de 33.248 èuros e 77.000 èuros, respectivament.
· Formacion e qualificacion des persones trabalhadores damb un budget autrejat de 28.418 èuros.
· Desvolopament economic locau damb investiment de 13.126 èuros.
Eth SOC manten contacte constant damb eth Conselh Generau d’Aran tà aconselhar-les enes recorsi en vigor e poder satisfèr es sòns besonhs formatius damb programes coma Formacion damb Compromés de Contractacion (FCC), a trauès deth quau se subvencionen entitats e centres de formacion acreditadi entàs quaus realizen accions de formacion entara ocupacion damb un compromés de contractacion des escolans.
D'un costat, a trauès dera Oficina de Trabalh (OT) de Vielha e Mijaran, er an passat se geriren 250 ofèrtes de trabalh damb un totau de 356 lòcs de trabalh aufridi. Ath delà, ua centea de persones an estat beneficiàries de sesilhes d’orientacion professionau individualizada, e ua auta centea mès s’an beneficiat de sesilhes grupaus d’orientacion professionau tà ajudar-les ena insercion en món professionau.
Fin finau, en encastre dera integracion professionau des persones damb impeditat, eth Departament de Trabalh, Ahèrs Sociaus e Familhes destine un budget de 103.569 èuros ath centre especiau de trabalh que i a ena Val d'Aran, a on trabalhen sèt persones en prètzhèts de bugadaria.