Eth Govèrn, eth Conselh Generau d’Aran e era Universitat de Lhèida signaràn ua convencion entà qu’es Espròves d’Accès ara Universitat se poguen hèr en aranés
- Aguest an, era opcion der aranés s’includirà enes enonciats der examèn d’istòria des PAU, matèria obligatòria entar ensems des escolans
- En successives convocacions s’ampliaràn es matèries disponibles
Eth Govèrn dera Generalitat, a trauès deth Departament d’Entrepresa e Coneishement, eth Conselh Generau d’Aran e era Universitat de Lhèida (UdL) signaràn propdanament ua convencion perque es Espròves d’Accès ara Universitat (PAU) se poguen hèr en occitan, aranés en Aran.
Aguesta convencion met de manifèst eth compromés deth Govèrn de dar responsa ara diversitat lingüistica de Catalonha. Damb era introduccion d’Aranés enes PAU eth Govèrn non sonque promò er usatge, era difusion e eth coneishement der aranés senon que da pos, ath delà, era sua normalizacion.
Era possibilitat de realizar es examèns en aranés entraïne un reconeishement ara trajectòria estudiantiu des escolans aranesi e un impuls important ara plea integracion d’aguesta lengua ena societat catalana coma lengua veïculara damb efèctes juridics valids.
D’aguesta manèra enes Espròves d’Accès ara Universitat de 2019 a qué se presenten es estudiants d’Aran, s’includirà era opcion der aranés enes enonciats der examèn d’Istòria, matèria obligatòria entà toti es escolans. En successives convocacions se poderà ampliar es matèries enes quaus s’establisque era opcion d’enonciats en aranés.
Recentament se signèc, tanben, ua convencion damb Andòrra, er Estat vesin, entà qu’es estudiants d’aguest Estat poguen hèr es PAU ena Seu d'Urgell, en tot evitar atau eth desplaçament enquia Lhèida, coma ère abituau.
Aguestes dues convencions arresponen ara volentat dera Generalitat de Catalonha de facilitar era collaboracion entre administracions damb era finalitat de dar un més bon servici, ua més bona cobertura territoriau e ua més bona atencion ara nòsta diversitat lingüistica coma país.