Era fibra optica dera Generalitat arribarà ara Val d'Aran eth 2020
- Vielha e Naut Aran demoraràn connectadi damb fibra optica dera Generalitat eth 2020, e era rèsta de municipis, eth 2023
- Eth Govèrn preve mantier e melhorar es nivèu de cobertura mobila quan s’abòrde eth procès de migracion as hilats 5G
Eth Govèrn preve hèr arribar era fibra optica dera Generalitat ara Val d'Aran er an 2020, damb eth desplegament en Vielha e en municipi de Naut d’Aran. Açò serà gràcies ara estenduda de 22,2 quilomètres de hilat corresponents ath tram Llavorsí – Vielha. Er an 2023 s’arribarà ara rèsta de municipis, damb 39,8 quilomètres mès de desplegament.
Aguestes donades son includides en arrepòrt qu’eth departament de Politiques Numeriques e Administracion Publica a presentat pendent eth Conselh Executiu d’aué.
Abordar es projèctes de desplegament deth hilat de fibra optica dera Generalitat 2020 e 2023 ei ua tòca prioritària deth departament, tà promòir eth desplegament per part d’operadors de hilats d’accès basadi en fibra optica que permeten dotar de cobertura e promòir era concurréncia de hilats de naua generacion enes municipis dera Val d'Aran. Ath delà, trabalhe tà dispausar d’ua rota canalizada alternatiua pera connexion d’Aran tà evitar es copadures enes periòdes iuernaus, que son es de maxima influéncia.
Cobertura mobila
Eth Departament tanben preve mantier e melhorar es nivèus de cobertura 3G e 4G quan s’abòrde eth procès de migracion as hilats 5G. Per çò qu’ei dera cobertura mobila, es donades de simulacion de cobertura 3G e 4G de qué dispause era Secretaria de Telecomunicacions, Ciberseguretat e Societat Numerica indiquen que mès deth 99% dera superfície urbana dispause de cobertura 3G e 4G.
Eth Departament de Politiques Numeriques e Administracion Publica darà pos a mesures tà promòir eth desplegament de hilats 5G, en tot completar eth hilat fisic de fibra damb un ensems d’espacis entara installacion d’equips 5G damb connexion dirècta en hilat fisic e orientadi ara propagacion de servicis intelligents, mobils 5G e de connectivitat.
Tors de radiocomunicacions
Actuaument i a sies tors de radiocomunicacions ena Val d'Aran e que son metudes a disposicion des operadors de radiocomunicacions de manèra indirècta per mejan de concession, pera provision de servicis via ràdio. Segons es donades de qué dispause era Secretaria de Telecomunicacions, Ciberseguretat e Societat Numerica, eth 98,6% dera poblacion dispause de cobertura TDT des canaus dera TVC e eth 93,8% dera poblacion dispause de cobertura FM des emissores de Catalonha Ràdio.