Eth Govèrn apròve un plan tà promòir era lengua e era cultura araneses a trauès der IOC
- Era accion, que se met en marcha ongan, preve era concrecion dera ofèrta educativa en IOC, era creacion d’un espaci en hilat entàs professors e repréner era publicacion definitiva des curriculums oficiaus en ensenhaments der aranés
Eth Govèrn a aprovat er acòrd corresponent ath Plan d’accion entath foment dera lengua, tradicions e cultura der occitan, aranés en Aran, a trauès der Institut Dubèrt de Catalonha (IOC) deth Departament d’Educacion. Eth Govèrn considère de besonh dar pos ad aguest plan per çò qu’er Aranés ei era lengua pròpria d’Aran e lengua oficiau, e deven un des pilars e un des trèts fondamentaus que configuren era identitat aranesa. Ei per açò, que serà present ena ofèrta educativa en Catalonha per mejan der IOC.
Aguesta accion, que se met en marcha ongan, preve com se concretarà era ofèrta en IOC, era creacion d’un espaci en hilat coma repositòri d’usatge compartit pes professors e eth hèt de poder repréner era publicacion definitiva des curriculums oficiaus en ensenhaments der aranés enes diferenti nivèus d’ensenhament. Per çò qu’ei dera concrecion dera ofèrta, s’amiarà a tèrme ua convocacion d’ua jornada de participacion, damb expèrts ena matèria tà definir era ofèrta mès ajustada tà contribuïr ara difusion dera lengua e cultura occitanes pertot deth territòri, se ne definiràn es contenguts e se concretarà eth perfil des professionaus que poderàn dar era formacion.
Per çò qu’ei dera creacion der espaci en hilat coma repositòri d’usatge compartit, que serà d’accès entà toti es expèrts assistents ara jornada, compdarà damb apòrts d’articles, presentacions, unitats didactiques e formatives, e auti materiaus qu’ajuden ara preparacion des materiaus curriculars vinculadi ara ofèrta formativa. Tanben se crearà e gerirà un espaci virtuau entath coneishement, documentacion e profitament pedagogic deth patrimòni arquitectonic e culturau d’Aran, que serà dubèrt a toti es centres educatius de Catalonha, disponible de cara ath cors 2019-2020, damb ofèrta des materiaus e des prepauses didactiques elaborades per professorat especialista.
Fin finau, er acòrd prevé repréner pendent eth dusau trimèstre de 2019 era publicacion definitiva des curriculums oficiaus en ensenhaments der aranés enes diferenti nivèus d’ensenhament tà dar ua referéncia normativa que contextualize era metuda en plaça dera ofèrta formativa d’aranés que s’amiarà a tèrme per mejan der IOC.
Antecedents
Enes darrèri corsi, eth Departament d’Educacion a promoigut diuèrses accions a favor dera lengua occitana, entar ensems deth territòri, coma era elaboracion de materiaus didactics e de recorsi entath professorat, auti materiaus tà trabalhar era intercompreneson, e era creacion d’ua pagina de recorsi pedagogics entar ensenhament e er aprendissatge der occitan entàs professors de Catalonha. Tanben, coma formacion de mèstres e professors, s’an organizat jornades de formacion sus es metòdes d’intercompreneson de lengües romaniques e s’an aufrit corsi d’introduccion ara lengua e era cultura occitanes en linha organizadi peth Departament a compdar deth cors 2015-2016. Tanben s’an publicat recorsi en portau des estudiants deth sistèma educatiu.