Eth Govèrn apròve dar pos era modificacion dera Lei der espòrt de Catalonha tà crear e arreconéisher es federacions esportives araneses
- Damb aguesta reforma, es institucions pròpries d’Aran poderàn compdar damb ua airina de besonh entath plen exercici des sues competéncies sus er impuls, era coordinacion e eth foment der espòrt en Aran
Eth Govèrn a aprovat dar pos ara modificacion dera Lei der espòrt de Catalonha tà crear e arreconéisher es federacions esportives araneses. Aguesta modificacion ei promoiguda peth Departament dera Presidéncia, a trauès dera Secretaria Generau der Espòrt e dera Activitat Fisica, e en collaboracion damb eth Conselh Generau d’Aran. S’amiarà a tèrme ena actuau Lei der Espòrt de Catalonha, mès se poderie incorporar ena naua legislacion esportiva de Catalonha qu’actuaument trabalhen amassa eth Govèrn e es promotors dera Iniciativa Legislativa Populara tà ua naua legislacion esportiva catalana.
Per çò qu’es institucions pròpries d’Aran an, en vertut der article 57 dera Lei de regim especiau d’Aran, competéncies d’impuls, coordinacion e foment dera practica esportiva en sòn territòri, e qu’aguest territòri a ues caracteristiques peculiares e ua longa tradicion desvolopada en relacion damb es espòrts ena natura, eth Govèrn considère avient establir ua regulacion especifica que permete era existéncia de federacions esportives pròpries d’Aran.
Aguesta opcion exigís introdusir ua excepcion ath principi de federacion unica entà cada modalitat esportiva, previst en article 18 dera Lei der espòrt, çò que permeterà era existéncia de federacions d’Aran d’espòrts entàs quaus ja existís ua federacion catalana.
Damb aguesta reforma, es institucions pròpries d’Aran poderàn compdar damb ua airina de besonh entath plen exercici des sues competéncies sus impuls, coordinacion e foment der espòrt en Aran, en tot assumir totes es facultats qu’era Lei der Espòrt atribuís ath Govèrn dera Generalitat en relacion damb es federacions esportives catalanes.
Damb tot, es federacions araneses auràn eth madeish estatut en vigor des federacions catalanes, damb dues uniques diferéncies. D’un costat, e partint deth principi de federacion unica, es federacions esportives catalanes conservaràn es foncions previstes en aguesta Lei relatives ara representacion en institucions e competicions estataus e internacionaus, e es corresponentes as seleccions catalanes. E der aute, s’aplicarà un regim especific entara constitucion des federacions d’Aran quan ja existisque ua federacion esportiva catalana, per çò que, en aguest cas, non ei de besonh avalorar de nau es extrèms referidi as condicions deth corresponent espòrt, senon unicament es especifiques d’Aran.
A compdar dera modificacion dera lei, es federacions catalanes e es araneses establiràn convencions tà garantir as esportius e as institucions esportives d’Aran er accès as madeishi drets de qué gaudissen era rèsta d’esportius de Catalonha e tà regular era sua participacion en competicions estataus e internacionaus e enes seleccions catalanes.
Es cambiaments legislatius qu’eth govèrn promò aué entraïnen, en prumèr lòc, era modificacion der apartat prumèr der article 18, en tot includir un incís finau, que demore dera següenta manèra:
“Sonque se pòt arreconéisher, laguens der encastre territoriau de Catalonha, ua federacion esportiva entà cada espòrt, modalitat esportiva o ensems de modalitats esportives que deriven d'un concèpte o un objècte principau o i son connectadi. Se n’exceptuen es federacions poliesportives dedicades ath foment, era organizacion e era practica de distintes modalitats enes quaus s’intègren unicament esportius damb diminucions o impediments fisics, psiquics, sensoriaus o mixtes, e tanben es federacions esportives d’Aran, cossent damb eth regim previst ena DA-- d’aguesta Lei.”
E en dusau lòc, i a era intencion d’incorporar ena Lei der Espòrt ua naua disposicion addicionau especifica sus es federacions esportives d’Aran que, enes diuèrsi apartats, establís qu’es federacions araneses dispausen de personalitat juridica pròpria, plea capacitat e autonomia, e se regissen pera regulacion des federacions esportives catalanes; que correspon as federacions pròpries d’Aran es facultats de cooperacion damb es federacions espanhòles e es institucions dera Generalitat en exercici des sues foncions d’impuls e desvolopament dera activitat esportiva en territòri d’Aran, en tot includir es relacions financères, e qu’era federacion catalana e era respectiva federacion aranesa fixaràn per mejan de convencion es montants e un possible finançament pes servicis addicionaus aufridi pera federacion catalana tàs entitats e esportius federadi en Aran.
Aguesta disposicion addicionau determine, ath delà, qu’es facultats administratives d’intervencion sus es federacions esportives corresponen, en cas des federacions pròpries d’Aran, ath Conselh Generau d’Aran. Es acòrds de transferiment determinaràn es foncions, es accions de cooperacion damb es federacions e es recorsi economics de besonh que, en aguest darrèr cas, s’integraràn ath hons entath finançament deth Conselh Generau previst en article 89 dera Lei deth regim especiau d’Aran.